撐艇入大會堂，游水過彌敦道，去青馬大橋浮潛？呢啲唔係夢想，而係災難預警。國際環保組織CarbonStory最近開設咗一個「水世界」網站（ http://worldunderwater.org），結合Google街景，利用電腦模擬技術，描畫出一個碳排污失控嘅地球。網民只要輸入一個地區，例如「中環」、「尖沙嘴」等，網站就會展示未來水平線位置，效果逼真。
海平線升25米
八方將青馬大橋輸入網站，赫然發現成條跨海大橋沉咗落海，得番橋面吊索，旅遊巴士如果夾硬要駛過，就會變咗得番車頂喺水面嘅潛艇。呢啲畫面係假設人類濫用能源，污染不斷，碳排放造成嚴重全球氣候變暖，冰川融化，導致水位上升25米。
今年6月5日係聯合國世界環境日，口號係「提高你的聲音，不是海平線」，CarbonStory響應，搞咗個水世界網站，希望世界各地明白不斷污染環境，對自己居住地方所造成嘅惡果。組織引述氣象學家James Hansen預警，喺2103年，大氣層積聚嘅二氧化碳濃度首次超過400ppm（百萬分之400），咁樣搞法會令到地球海平線最終升高25米。
總部喺新加坡嘅CarbonStory指出，「水世界運動」目的唔係要營造嚇人嘅效果，而係喚醒世人關心氣候變遷問題，想辦法齊齊拯救地球。而組織創辦人Olof Lundström就話，氣候變遷問題已經講咗好多年，但係不幸地至今仍然未見有足夠行動去制止。
mailto:[email protected]