財經刊物《Institutional Investor》每年年初都會搞最佳分析員選舉，需知道唔同行業（sector）都有一班分析員去睇，《II》就會選出每個行業嘅最佳分析員，兼且畀埋排名。
德銀肉麻電郵拉票唔受落
16個行業當中，美銀美林有7組分析員獲評為「冧巴溫」排第一，包括近年多投資者關注嘅消費、賭股、互聯網股份等。
至於近年頗為出位、向基金客戶發出感情豐富到近乎肉麻電郵去拉票嘅德銀地產分析員，就三甲不入；排第一係花旗嘅Oscar Choi團隊，瑞信與美銀美林分析員分別排第二與第三。
摩根士丹利係另一間有較多分析員獲評第一嘅外資行，包括睇銀行、醫藥、保險、電訊股嘅分析員都排第一。聽聞，分析員要獲客戶畀高分，除咗出研究報告叫買叫沽要準，令客戶賺錢，平日亦要不斷同客戶溝通，畀到足夠資訊，總之都係要夠勤力。