《食神》智慧，瀨尿蝦同牛丸，並非魚與熊掌，並非敵我矛盾，並非你死我亡，並非南韓北韓，而是可以溝埋，1+1=3，是為「瀨尿牛丸」！問題是，瀨尿蝦同牛丸妥唔妥對方？肯唔肯你中有我，我中有你？
現在所謂「溫和民主派」同「激進民主派」，或者「現實派」和「理想派」，或「真民主派」同「投降民主派」，漢賊不兩立，不肯溝埋。
鄭宇碩想做「食神」，將佢哋溝埋做一粒叫「真普聯」的牛丸，但要做瀨尿牛丸，要借用火雞姐驚人腕力，每片牛肉要打二萬八千幾次先打到佢哋服……市面誰人有火雞姐這種「腕力」打到爭普選的牛肉貼服呢？有政黨背景的都說自己搞獨立推銷，黨無約束力；陳太以及一眾學者，風光不再，對着高民望的學民思潮，你點可能叫佢服？
再者，瀨尿牛丸彈到可以打乒乓波；但今天的討論，不論中央乃至民主派，彈性好低。中央固然大石壓死蟹，但民主派，在「公民提名必不可少」的前提下，任何「非公提派」都會被懷疑標籤為「投降派」，在討論中完全處於下風。
手執一票的立法會議員，也因此閃閃縮縮，不敢提出自己投票立場，只懂說「睇民意」。因為無彈性空間讓「非公提派」可以活動。
瀨尿牛丸還有秘訣，便是中間空心，才可以包漿爆漿。但今時今日講包容，一提便已經被人爆你漿啦老友。
鄭教授好想溝埋做「瀨尿牛丸」，但非公提派認為自己被公提派搶去鋒頭，「如果太多牛奶味朱古力味無埞企」，於是在「食神牛丸」未上市前，瀨尿蝦和牛丸已經決裂，誰還溝埋，誰才真是笨了！