快艇班主史達寧日前公開就種族歧視事件道歉，以為佢洗心革面做番好人啦，點知佢接受CNN嘅電視訪問時，竟然又「上身」！雖然史達寧口口聲聲話唔係種族歧視人，只係唔忿氣女友同其他人一齊，點知越講越離譜，先寸魔術手莊遜得愛滋病係咎由自取，又話魔術手扮得好高尚，實情係佢喺每個州都有情人，絕對唔係小朋友嘅榜樣，反而自己每星期都去教堂祈禱。
史達寧今次招惹埋一眾病患人士，風波相信會鬧得更大，不過史達寧仲死撐，話球員、贊助商同其他班主都唔憎佢，一切只不過係聯盟製造出嚟嘅假象，鴕鳥成咁，真係幫佢唔到嘞！NBA總裁阿當施華就立即企出嚟，代史達寧向魔術手道歉，仲堅決唔畀史達寧再做班主。