勒邦占士（LBJ）雖然失落今季常規賽MVP，不過踏入季後賽，就真正顯示出佢嘅MVP風範！周一NBA季後賽東岸次圈第4戰，佢就攻入49分，幫熱火以102:96擊敗網隊，場數領先至3:1，賽後連網隊前鋒皮雅斯都投降。
LBJ好快從第3戰失準恢復過嚟，今場唔單止鏟籃，連3分外投都得心應手，3分球6射3中，仲博到19個罰球，搞到負責mark佢嘅皮雅斯（PP）深陷個犯危機㖭。講到熱火，又點少得其餘兩個巨頭，大前鋒保殊繼續「冷面殺手」本色，最後57秒就係靠佢射入3分，幫球隊領先97:94；「閃電俠」獲迪雖然得分能力大不如前，勝在經驗搭夠，最後16秒搶到關鍵進攻籃板，搞到網隊焗住要用犯規戰術；熱火射手阿倫就冇甩拖，最後階段4罰全中，幫球隊以6分之差勝出，只要周三回師主場贏多一場，就可以晉身東岸決賽。
PP投降：一個人點守佢
平咗個人季後賽得分新高嘅勒邦占士，賽後就好風騷咁講：「我喺最後階段射失罰球，拎唔到50分，係我人生中首次贏波而覺得失望嘅比賽。」PP就認晒輸咁講：「一個人根本冇可能防守到勒邦占士，我哋需要減慢佢嘅速度，而且要補位，但今場波我哋做唔到。」
同日西岸另一場次圈比賽，拓荒者總算拎番些少面子，憑尼拉特攻入25分，主場以103:92擊敗馬刺，場數追成1:3；但馬刺只要周三返番主場擊敗拓荒者，都可以順利晉身西岸決賽。