【中環】現年42歲嘅蔡曉儀係90年代亞視當家花旦，但12年前拍完《法內情2002》就退出咗娛樂圈搞時裝生意，可惜最後捱唔住貴租執笠收場。
早排，蔡曉儀曾放風想再拍番嘢，因為𠵱家流行美魔女，加上見到羅霖咁靚，佢都想復出，仲話會改吓個形象。不過，前幾日記者咁啱見到蔡曉儀「踢拖」加素顏現身中環，一身粉紅look打扮嘅佢，如果要復出，當務之急似乎先要踢走個肚腩同戒甩煙癮。
彈煙灰落地
蔡曉儀當日行行吓突然煙癮大發，匿喺一幢商業大廈後巷瘋狂扯煙，仲邊扯邊彈煙灰落地，其間一位清潔女工經過佢身邊將煙灰掃走，佢仍然無任何反應，繼續吞雲吐霧同攞住手機係咁㩒，「嘆」完之後就去咗附近一間髮型屋，逗留大約半個鐘就坐港鐵向柴灣方向離開，作風平民。
採訪、攝影：潘冠恩
