好多居港多年嘅外國人識聽識講廣東話，據聞大酒店（045）主席嘉道理連廣東話粗口都識，只係平日齋聽唔出聲。和黃（013）大班霍建寧噚日爆料，指和黃大掌櫃陸法蘭其實都識廣東話㗎喎。
話說噚日同系和電香港（215）舉行股東會，貴為藍籌打工皇帝、舊年年薪1.9億元嘅霍建寧，兼任呢間公司主席，噚日心情勁好，表現輕鬆，一坐底就向全場小股東話「今日全部香港人，唔使講英文，可以開翡翠台」。
講完，霍大班先醒覺，附近坐咗位外國籍人士，之唔係佢同事陸法蘭囉。霍大班即刻指住對方話「佢話佢識聽廣東話喎」，股東會於是繼續以廣東話進行。和電香港一班公公婆婆小股東似乎好滿意呢間公司，全程冇人提問，20分鐘就散會了。
來自加拿大嘅陸法蘭效力和黃超過20年，成日要同老細李嘉誠開會，識聽廣東話一啲都唔奇。