恭喜曼城（圖）贏得本屆英超！但冠軍只有一個，落敗的球迷別再心酸，希望以下無聊狂想可令你笑番。
重鋪草皮：利物浦決定將晏菲路中圈附近的草皮，改鋪防滑纖維人造草，以防再有人於關鍵時刻跣低。
維基解「莫」：曼聯於次循環敗給愛華頓後，立即炒掉莫耶斯的真正原因，是維基解密成功入侵莫帥電郵戶口，發現他輸波後發給家人的郵件：「我終於讓愛華頓雙殺曼聯了！」從而確認其內奸身份。
白宮出手：曼城、車仔、阿仙奴等19支英超球會球迷團結一致下，集齊10萬人網上聯署，要求美國白宮介入曼聯「無理解僱」莫帥事件；奧巴馬訪英時向卡梅倫查問：「有10萬人叫我幫莫耶斯搵番份工，佢喺曼聯做乜㗎？」卡梅倫：「……佢係負責破紀錄嘅。」
重見輝煌：本着對90年代輝煌的留戀及人多好辦事精神，曼聯決定邀碧咸入主做老闆，續任史高斯、畢特、尼維利兄弟做教練；並由傑斯、曉士、布魯士破天荒組成3領隊，組成外號「七福二士」的紅魔管理團隊。結果首場8人共同領軍，坐爆後備席，小豆同香川要坐摺凳。
人人搶7：來季於季尾時，明知爭標無望的強隊齊齊鬥失分，希望「搶第7」避開所有歐洲賽，以複製紅軍本季專心聯賽即有力爭冠的歷史；結果史篤城意外獲前4參加2015/16球季歐聯資格。
方柏翹
now足球評述員