早排有遊戲商將《3D豪情》開發成網上遊戲，但係部戲因為今次票房欠理想，所以原本諗住拍嘅第三集都冇咗。至於個遊戲搵戲裏面一班日本AV女優夕樹舞子、沖田杏梨、葵司、麻生希等做埋model，完全植入去遊戲裏面，等玩家可以玩得更投入同興奮。噚日遊戲生產商喺銅鑼灣派試玩卡引起途人注意，當中有情侶都俾個啲人型燈箱吸引。據負責人透露，為咗招呼一班遊戲迷，佢哋公司預備咗好多禮物送，佢話：「準備咗好多印咗女優樣嘅3D滑鼠墊，最特別喺準備咗幾套班女優着過而冇洗過嘅三點式泳衣。」第一炮就會係送出葵司體味泳衣喎。
阿澤繼續受抵制
至於杜汶澤繼續受到內地抵制，不過《中國青年報》刊出《網絡抵制者別拿阿Q當榜樣》嘅文章撥亂反正，簡單講呢種網絡抵制，係弱者所為，顯示出抵制者狹隘同幼稚。不過愛國如命嘅溫兆倫接受內地傳媒訪問時借阿澤過橋，佢喺訪問話：「我認為不要抵制他來（內地），中國人不要對自己的同胞有任何的歧視。」仲話如果阿澤嚟到北京，好有興趣聽下佢講點樣唔愛國喎。
撰文：馮仁昭