眷戀英國殖民地嘅朋友注意喇，普藝拍賣公司將會喺本周六，拍賣一幅喺1888年香港英殖時嘅地圖，呢幅地圖嘅香港仲係冇咗新界，只得香港島同九龍半島，最北都係界限街，英屬範圍填上粉紅色。呢張地圖係英國一間出版社126年前嘅出品，底價$5,000。
呢幅冇新界、「零填海」嘅香港地圖，透露咗好多地方以前嘅名字，例如黃竹坑一帶，叫做「Little Hong Kong」，黃竹坑道附近有條Little Hong Kong Road。由西環至灣仔一帶，當時叫做「City of Victoria」。九龍半島方面，有個地方叫做Taiwan，唔係台灣，而係改咗名嘅大環山一帶。
除咗地圖，仲有好多黑膠唱片拍賣，最貴價嘅係鄧麗君嘅黑膠唱片，整套連其他歌星一共十張唱片，底價$1,000，睇番當年嘅價錢，每張都$15、$16。梅艷芬一套六張黑膠唱片，底價$300。