曾經講過「沒有國哪有家」嘅溫兆倫，為了證明自己有一顆「愛國心」，當然要搵啲人做「比對」，日前愛國溫又接受內地傳媒訪問，繼續講自己嘅愛國情操，堅決地說：「我是一個中國人，我不愛中國，你叫我愛哪個國？」訪問期間，愛國溫一講到愛國，便好激動，仲代表香港人謂:「大部分香港人都是愛國的。」
溫兆倫又話，自己完全唔識杜汶澤，最離奇係，愛國溫竟然提議阿澤:「我們歡迎他們到北京天安門廣場，我願意出席聽一下他高呼怎樣不愛國。我歡迎，我期待著。」不過，噚日喺內地機關報《中國青年報》刊出一篇文章《網絡抵制者別拿阿Q當榜樣》，批評抵制嘅網民成就感只不過係阿Q式嘅「精神勝利法」，又認為抵制一直係弱者用嘅手段，其實係從下向上嘅自感委屈同弱勢嘅角色扮演遊戲。文章入面又講到，藝人夠膽講大家都開心嘅公共議題，點都好過有事唔出聲淨係識搵錢；而當中好多人喺抵制過程入面「自我感覺良好」，其實只係顯示咗自己嘅狹隘同幼稚。