當你愛上一個人，愛到死去活來，完全唔知自己去得有幾盡，唔好彩嘅話，愛情泡沫突然「哎吔」一聲，爆破咗，人生指數突然恐慌性急插，試問有幾多個人能夠短短幾個月就恢復過來呢？呢種創傷，甚至三、五、七年都未必好番。其實，股市，炒到死去活來，泡沫爆破之後，一樣需要好長、好長嘅時間去恢復。如果要畀中資股一個恢復嘅期限，晉佳認為，好難唔超過十年。
A股要翻身 最少要十年
回想起中資股之前嘅一個泡沫，就係千禧年科網股熱潮，當年求其一個網，都可以炒高幾十倍，泡沫玩到有幾盡得幾盡。結果納指2000年3月喺5132點見頂，之後分別喺2002同2009年形成雙底，然後再回升。如果以2009年初低位1265點計算，納指足足要用九年時間先可以正式搵到個底，可見瘋戀過後，創傷原來要用咁多年嚟恢復。而直至2014年後嘅噚日，納指升番去4143點，總算幾乎收復失地。2003至2007年，另一個巨型泡沫形成，她的名字叫中資股。2007年10月，A股滬綜指攀上6124點嘅高峯，然後2008年一場金融海嘯，將滬綜指打落1800點。由泡沫爆破嗰一刻計，到而家已經六年半，滬綜指原來仲係2050點，喺低位原地踏步，究竟見底未？觀乎千禧科網股熱潮同中資股熱潮嘅瘋狂程度，實在不遑多讓，納指要九年先見底，滬綜指似乎都有咁嘅可能。
先唔講股票需求一潭死水，剩係睇中資股股票供應，都已經夠嚇死人，A股IPO、解禁股、整體上市，乜嘢都係用新股票嚟換錢，足以揸乾股民資金，咁嘅環境，試問中資股點會好。
由2010年到而家，乜嘢內銀股、內房股、內險股，都變晒價值陷阱，點解？根本就係中國個系統有問題，周身爛資產、高負債，上市公司本身負債已經多，點知母公司央企仲勁，剩係中鋁（2600）母公司去年底淨負債比率380%，睇嚟阿爺張附屬卡，真係碌到冇得再碌，點算？大家驚要埋單，乜嘢低市盈率、低市賬率，行埋一邊罷喇！
場邊唔少花生友，成日睇死中國會出現內房泡沫爆破，金融系統崩潰，中國就此淪陷。至於晉佳就認為，人類始終係解決問題嘅靈長動物，係唔會由得金融體系去死。之但係恐懼又係人類嘅天性喎，而家夠驚未？似乎未夠，大把人覺得內銀股仲係穩陣，一定唔會執笠，相信未反映晒系統性危機。當大家覺得系統性危機冇可能唔爆，壞消息出到冇得再出，你到時試下喺facebook個status講「瞓身買內銀股」，如果有100個comments叫你唔好自尋短見，咁先係見底之時。
晉佳
本欄逢周三刊登