烏拉圭教練泰巴利斯公佈世界盃25人初選名單，呢份名單驚喜唔算大，主力球員包括蘇亞雷斯、卡雲尼、科蘭等，全部順利入選名單之餘，修咸頓嘅加斯頓拉美利斯都榜上有名，有機會首次代表國家踢世界盃，但較為意外嘅係，今季俾利物浦外借到烏拉圭國民隊嘅中堅高亞迪斯都有入選。泰巴利斯會喺呢25人入面再篩走兩人，其餘嘅23人就會代表烏拉圭去巴西踢世界盃。
朗尼度假不忘keep fit
烏拉圭隊中今季喺英超踢到風生水起嘅利物浦前鋒蘇亞雷斯，就將會聯同美斯同杜斯山度士奧斯卡等球星，喺世界盃期間着上「三間」嘅新波砵落場。呢一對叫「Battle Pack」系列嘅波砵喺外型上同舊款冇乜大分別，但係喺顏色上就作出咗突破。所有波砵都以黑色同白色為主，而且兩隻顏色啱啱好各佔砵嘅一半，據聞鞋上圖案嘅設計靈感係來自各民族戰士出戰前搽喺身上嘅顏料，同埋里約熱內盧一個海灘上嘅古代美索不達米亞標誌性行人路設計得嚟嘅，再配合代表住雷米金盃嘅赤金色三間，不過我求大俠睇佢對新波砵就似足條金錢斑游水魚（小圖）。唔知阿蘇着住呢對砵，會唔會有更好嘅發揮，幫球隊喺死亡之組D組入面脫穎而出呢？
另一方面，烏拉圭嘅同組對手英格蘭，隊中球星朗尼趁球季完結仲有啲時間，就去咗葡萄牙度假。但喺佢都冇怠慢，度假之餘都冇忘記到嚟緊六月仲要踢世界盃。有見及此，佢就帶埋兩個專家同佢一齊去葡萄牙，專責幫佢保持狀態。咁有誠意，我求大俠都希望朗尼可以帶領英軍喺世界盃走得更遠啦。