長毛上月喺立法會二讀預算案撥款時，因唔滿意財爺曾俊華唔搞全民退休保障，衝出位用陰司紙掟佢，換嚟財爺一句「行開啦」反擊。八方聽聞一班建制派議員，噚日喺立法會行政管理委員會會議入面，借呢單嘢向當日主持會議嘅立法會主席曾鈺成「開拖」，鬧主席「冇做嘢」，班建制派喺會入面講到好兇狠，又話要「整個欄」阻長毛出位示威、又話要報警，仲有人講到要同長毛「隻揪」！不過曾主席當佢哋「發噏風」，見記者時只係話採納咗立會秘書處建議，日後會確保會議室內至少有三名保安駐守，自己亦會早啲向長毛發出警告。八方真係想睇吓，下次長毛再掟陰司紙，係咪真係有建制派議員走去同長毛「隻揪」！