近日本港天氣變幻莫測，大酒店（045）主席米高嘉道理亦中招，病倒了，仲病到失聲講唔到嘢㖭。噚日大酒店舉行股東會，佢依然有出席，個樣睇落唔算好病，不過原本由佢發表過去一年集團業務簡介，就要交由副主席貝思賢頂上。
嘉道理喺股東會後都冇趕住閃，聽埋傳媒提問，傳媒喺會後向佢問好，佢都只能細細聲回覆一句：I cannot speak！
講番股東會，會上有一名中年小股東不斷追問，點解公司派息得毫幾子咁少，酒店裝修費都過十億元啦。
管理層於是係咁向佢解釋，指派息毫幾子其實都唔少，扣除物業重估收益，集團舊年派息等於每股基本盈利四成，屬於合理水平咁話。