近期港股走勢反覆，新股招股自然要諗計提高知名度。好似生產女性內衣布料嘅超盈國際（2111），雖然公司名跟賭王千女何超盈一樣，但公司本身名氣一般，噚日舉行投資者推介會時，竟然可以吸引150名賓架同分析員到場，原因應該只得一個，就係有內衣花生騷。
超盈生產胸圍上嘅彈性布料、bra帶同蕾絲，唔少國際大品牌好似Victoria's Secret、馬莎、Wacoal等都係佢嘅客。公司於是特登喺推介會上安排一場內衣花生騷，畀賓架、分析員一邊食晏，一邊欣賞靚人靚衫。據講，請呢六名模特兒，兼搭個靚台，公司已經花費超過十萬元。