隔牆有耳:Q版巨星迎接世界盃 - 李八方

隔牆有耳:
Q版巨星迎接世界盃 - 李八方

四年一度世界盃喺6月12日開鑼,商機無限,新地旗下9個商場今次都會大搞特搞,準備用1,400萬去搞旺個場,包括喺東港城同無綫合作做直播騷,播完場波仲會即刻抽一位市民免費送佢去香港任何一個地方返工或者返屋企。佢哋旗下9間商場將會直播世界盃600小時賽事,仲會送出按摩套票,畀球迷通宵睇完波可以到按摩專區用按摩椅「鬆一鬆」。

新地又會安排200名基層市民到商場邊嘆美食邊睇波,其間會推出手機互動足球遊戲,畀顧客透過掃描QR Code捕捉大屏幕上的足球,勝出者可競逐「足金金球」。喺新蒲崗嘅Mikiki商場會設立「狗狗睇波專區」,主人可以同愛犬坐定定一齊睇波。而黃埔新天地就用咗300萬元,引入謝拉特、林柏特、蘇亞雷斯、尼馬等12位足球巨星嘅5呎高Q版像真3D公仔,由5月底開始畀市民合照。

新地9個商場都有節目直播世界盃。