泛民主派分裂已經係既定事實，人民力量陳偉業同民主黨何俊仁，噚日仲直接喺立法會「開拖」。話說噚日福利事務委員會傾開社福機構一筆過撥款嘅政策，先發言嘅陳偉業，一嚟就翻民主黨舊賬，譴責民主黨同當時做社福界議員嘅羅致光，出賣前線社工利益，話當日政府唔係得到民主黨支持，就冇可能通過到咁嘅政策。
指陳00年以民主黨名義參選
大嚿仲越鬧越㷫起，話民主黨若然真心支持一筆過撥款政策，點解唔喺教育界落實埋，直斥民主黨無恥「呢啲無恥政黨就係覺得社工好蝦」。佢又辣埋社福機構高層，大鬧一筆過撥款等同「肥上瘦下」，畀機會高層做賊剝削前線，自己就豪裝辦事處，兼夾去外國參觀，不過前線社工同新入職員工人工就縮晒水咁話。
跟住發言嘅何俊仁就聽到火起，即刻「數當年」寸番大嚿轉頭，回敬對方嘅惡言相向。佢數返歷史，話2000年一筆過撥款通過嗰陣，大嚿就係用民主黨個名參選，寸佢既然覺得係出賣香港，「唔該你就唔好用民主黨個名參選啦」，直斥陳偉業先至係最無恥嗰位，攞晒好處就走人。
平時惡慣嘅大嚿，不甘俾人話無恥，要求主持會議嘅張國柱裁決，但不獲受理，惟有嬲爆爆咁一邊走人，一邊勁鬧民主黨「奴才入中聯辦，出賣香港市民」，仲指住何俊仁話「未見過人咁卑鄙無恥」。何俊仁見佢咁嬲，再笑住寸多佢幾句，「你應該走啦，攞完啲錢就唔好嘈啦」，仲笑大嚿只係一味靠惡叫佢快啲走啦，「都多餘嘅，嘥氣！」成個會議室嘅人都當堂睇到呆咗。
mailto:[email protected]