金融海嘯發生後，時任紐約聯儲銀行主席蓋特納、財長保爾森同埋聯儲局主席伯南克三位，為救市合作無間，被稱為「救市三劍客」。不過蓋特納嘅新書《壓力測試（Stress Test）》就爆料，原來當年佢同另外兩人喺拯救雷曼兄弟一事上面有分歧。
外界都知，蓋特納比起保爾森同伯南克，更加傾向出手救雷曼。蓋特納就話，當時佢支持聯儲局借錢畀巴克萊收購雷曼，不過，就算聯儲局肯幫手，巴克萊嘅風險唔會減少，而且仲要過股東一關，所以英國嘅立場應該不變，英國政府唔會畀巴克萊買雷曼。
結果冇人買雷曼，儲局亦唔可以放貸，最終雷曼爆煲收場。佢話嗰次係金融海嘯期間，佢同保爾森嘅少數分歧之一，同伯南克嘅分歧就更大。蓋特納又提到，2007年曾獲提名做花旗行政總裁，結果難產，由潘迪特上任。後來佢咪去咗做財長囉。