近日天氣潮濕,美國駐香港總領事夏千福又出動搵食。佢上星期先同老細美國助理國務卿Daniel Russel去志蓮淨苑食齋,老細走咗,千福BB自然一身鬆晒。佢噚日就走咗去中環一間老字號涼茶舖,品嚐咗佢人生第一杯廿四味。佢對中國涼茶嘅歷史同功效都好有興趣。廿四味主要係清熱毒,唔通佢近排都好熱氣?有網民就覺得,夏千福今次呢個舉動,拍得住肥彭當年落區飲涼茶。但係呢,夏千福無論食乜嘢都好,每次網民最關心嘅始終都係,究竟佢幾時會去幫襯明將壽司,挑戰吓裏面嘅人間美食。千福BB,好多香港網民睇住你幾時會走入明將「打大佬」㗎!