香港女子乒乓隊三位主力球員之中，最好波一位係21歲嘅李皓晴，世界排名第14，其次係杜凱琹，排名25，吳穎嵐排名33，呢三位小花年紀小，照計可以當打五至七年，香港女子隊或者可以贏到世界盃亞軍都唔定（要打贏中國女子隊幾乎係mission impossible），香港隊教練李靜話李皓晴已達世界一流水平，公子L對左丁山講：「李皓晴係乒乓奇葩，佢小學時就參加青訓，當時佢係女拔學生，到咗中學階段，呢位讀書成績好好嘅名校女生竟然話願意放棄學業，全天候打乒乓波，乒總諸公都嚇咗一跳，因為香港家長好注重子女讀書，何況女兒係女拔萃叻女？當時大家勸佢諗清楚，同家庭詳細商議，可以一路打波，一路讀書考會考嘅箒，中五畢業後只是十七歲，咪可以專心全情投入乒乓球囉，但最後李皓晴還是得到屋企同意，放棄學業，全力衝出亞洲，登上世界舞台，坦白講，乒總好感動，對佢栽培不遺餘力，盡量俾機會，送佢出外比賽，爭取世界排名，今日佢排世界14名，當然全靠佢自己嘅毅力、努力，但係乒總出錢，亦非常緊要。」呢啲錢，其實政府可以俾嘅，但特區政府撥款支持甚麼盛事基金、龍獅，出手闊綽，幾千萬元已經係濕濕碎，結果就係搞到一塌糊塗，醜聞頻現（《蘋果日報》5月9日A10版），真係幾該煨咯，如果政府能夠每年撥款一兩千萬俾乒總，以及傷殘奧運等體育團體送運動員出外比賽，就功德無量。傷殘運動員每次出外比賽，淨係運送輪椅、器具，已所費不菲，難為Jenny Fung（馮馬潔嫻）等領導人年年向大機構「沿門托缽」，講出來就心酸，那似得陳鑑林議員佢地搵人舞吓龍舞吓獅就可以花錢花得爽快！代表文化體育界嘅立法會議員馬逢國唔知識唔識得，或者想唔想，向特區政府爭取呢？你估其他體育總會個個都好似乒總咁，有一批有錢有心有力嘅領導人咩。未必想做運動員，但想話打乒乓鍛鍊身體有何辦法？公子L話不少少年人跟私家教練學習，一小時收費約400元，教練幾乎係清一色內地省隊球員移民來港嘅，公子L兩位公子自小就跟隨國家隊級數嘅教練學乒乓，長大後到美國讀大學即刻入選大學代表隊。
（更正：昨天提及的「雪風神駒」並未贏過，只跑入過位置。）