民主黨區諾軒同俾人話「慢半拍」嘅新民黨海怡西區議員陳家珮早幾日爭相去到台北，搵商場嘅大業主「太平洋電線電纜股份有限公司」，抗議海怡商場變特賣場，二人今次「搵上門」嘅招數，惹來「同行」抄襲，公民黨派出海怡關注組召集人葉穗倫、人民力量就派出啱啱喺海怡區選落敗嘅主席袁彌明（圖）赴台，人人都喺個「太平洋電線」嘅招牌前影番張到此一遊，上載到facebook。
身在台北嘅Erica就話，已同負責人直接對話，提出租戶同居民嘅訴求，同時遞交1,500份問卷同埋簽名畀對方。Erica話今次赴台好驚險，因為赴台班機延遲咗4個鐘，唔知係咪因為大雨關係，成個行李嘅所有嘢都濕晒，Erica形容「水浸咁！」。
陳家珮亦喺facebook公佈此行收穫，佢引述大業主話知道海怡西商場面積有限，冇發展為大型特賣場嘅條件，又話商場裝修後，會盡量保留原有生活上必須商戶，例如醫生、補習社、音樂學校等。
區諾軒話，今次咁多同行相繼遠赴台北「搵上門」，原來呢條橋係「民間智慧」，話說原來係當日居民大會有人忽發奇想，話不如踩上門搵業主傾，正當以為係隨口噏，點知陳家珮同佢之後相繼起行。