統一（220）和死敵康師傅（322）去年打價格戰，玩買杯麵送腸仔、膠碗等招數，圖搶奪對方市場佔有率。戰役已進行超過一年，統一早就送腸仔送到見紅，舊年即食麵業務錄得1.43億元（人仔．下同）的虧損。但即使係咁，統一仍聲稱會抗爭到底，聞說上月已經加碼，玩到去買杯麵送戲飛了！難怪前晚公司宣佈以5供1進行供股，集資32.8億港元，以解燃眉之急。
所謂犧牲短期利潤、來保障長遠市場地位的策略，其實唔係無道理嘅。但統一要用呢招，勝算可以話係非常之低。首先在即食麵市場，康師傅本來就係market leader，已經大到難以用銀彈去逼退。再加上統一自己的收入，極度依賴單一產品（即「老壇酸菜牛肉麵」），抗壓能力非常低。雙方鬥燒銀紙時，康師傅仲可以靠谷其他產品去分散風險，但統一就要被人夾住來打。統一去年即使已犧牲margin去做推廣，即食麵的生意增長仍然大幅放緩，銷售升幅由上半年的15%降至下半年的3%。其實勝負早已顯而易見。統一去年總借貸增50%至60億，現金卻減38%至只有14.14億，財務壓力可想而知。今次供股雖為及時雨，但公司經營前景仍然困難，今年即食麵生意都難以扭虧。咁嘅形勢，今次的包銷商法巴和摩通，分分鐘要上身。
海迪