個市吽咗咁耐，噚日終於生猛返，幾乎個個板塊都勁有鑊氣，連之前因應少咗自由行來港而被狂質嘅扮靚股莎莎（178），跌到2012年11月新低後，都拗腰彈0.2%。不過，相信呢類股份，連同奢侈品牌、珠寶股即使回升都屬虛火。
如果讀者有追開呢個欄，就知早排菲菲講過名牌對搞網購嗤之以鼻嘅原因，但偏偏Burberry竟撞個頭埋天貓，結果開業18日，只賣132件貨，退貨率高達26.4%（唔排除有人去飲前，買件Burberry充大頭鬼，飲完就退貨）。Burberry肯「紆尊降貴」，更加印證奢侈品零售見頂。
戰友悶咗咁耐，係時候揀貨撈吓。噚日大家有眼見，獲富達國際增持嘅保利協鑫（3800）超強勢，全日升7.3%。呢個時候當然要望吓佢個friend卡姆丹克（712）。呢隻股跌咗咁耐，技術上見「早晨之星」，於1蚊水平守得靚，相信可以炒返轉。
事實上，美國總統奧巴馬大舉加碼20億美元，用以提升聯邦政府機關能源效率，增用太陽能板，相信可推動美國需求。加上據NPD Solarbuzz最新數據顯示，今年全球太陽能裝機需求40GW以上，最高上望49GW，相信今年光伏業的復蘇仲會持續下去。卡姆丹克今個星期五公佈業績，大家可以買定等放榜。
Fifi
本欄逢周二、四刊出