唔少炒開濠賭與科網股嘅散戶最近輸到一仆一碌，就連基金經理黃國英（Alex）都話，過去兩個月，係佢十幾年炒股生涯入面，最難捱嘅時段之一，「炒十幾年股，見過最差一年係2011年，而呢兩個月就係第二差」，佢仲預計旗下基金今年實輸錢，於是打算趁下月搞talk show，當係開壇作法，化身「黃大師」做場法事招運。
Alex今年talk show主題係「小注博大贏」，雖然話過去兩年，每年搞一場show蝕十幾廿萬，但佢每次之後都有運行。佢透露，搞show前，旗下基金每年新增客戶只得8人，𠵱家平均一個月都有10人，總客戶人數累計升四倍，由幾十人變幾百人，估計當中超過一百個客係受個show帶挈。
Alex舊年喺個show度寸盡一班基金經理同股評人，今年諗住入去剝花生嘅觀眾可能要失望嘞。
Alex預告，今次「戒咗行家」，皆因唔想「bring down to佢哋嘅level」喎。都話佢改唔到㗎喇，又寸咗行家嘞。