唔少女星愛於微博晒自拍靚相，有時仲會晒床照添，真係瞓喺床上面影嘅相呀。繼日前阿Sa（蔡卓妍）同阿嬌（鍾欣潼）先後晒床照，成功得到唔少like及留言後，唔知係咁啱得咁橋，定係有樣學樣，前晚又有女星影床照喇，今次主角係鄧麗欣（Stephy）。
前晚Stephy喺微博貼咗張床照，睇真啲張相，同阿嬌嗰張床照，真係有8成似，素顏Stephy就話：「本來以為明天可以殺青回家陪媽媽過母親節，現在通告改了明天走不了，懷著不怎麼好的心情笑一個晚安！」噢﹗原來Stephy因為工作關係，未能同媽咪過母親節，難怪相中的佢要強擠笑容，唔係咁開心啦﹗
不過呃like就唔一定要床照嘅，用長腿一樣得！噚日正值母親節，擁有「三重身份」──即既係人妻﹑又係靚媽﹑兼且係女神嘅謝安琪(Kay)，會點慶祝呢？佢喺微博就冇特別講點樣慶祝母親節，可能留畀佢細心又大隻嘅老公張繼聰去諗啦。
反而Kay喺微博貼咗張着住超短褲嘅照片，大晒無敵白0雪0雪長腿，真係不得了。平時Kay都有晒長腿，但係相中呢對腳，視覺上成個人比平時高咗啲喎，睇嚟又真係角度的重要性啦，唔少網民都讚佢下巴好尖，又話佢瘦咗好多，又話張相顯得佢好高！