逾13億人口的中國，跟日本一樣面臨人口老化問題。雖然即將從職場退下來嘅銀髮族，令勞動人口減少，生產力下降，不過，有調查發現內地銀髮族係「消費金礦」，除咗存款多，使錢仲好豪爽。有企業同私人銀行都瞄準商機，向銀髮族嘅衣食住行全方位進攻。
Euromonitor統計資料顯示，2013年中國年收入在15萬美元（約93.4萬元人民幣）以上嘅高收入人口中，逾半數人年齡為40至50歲。至於奢侈品牌針對嘅70後客戶，雖然佢哋收入都唔少，但佢哋嘅財務負擔相對較重。顧問公司Ageing Asia統計資料顯示，2012至2017年內地60歲以上的家庭存款，扣除物業資產後，將暴增至8.14萬億人仔。
內地大型網上旅遊社攜程網近期推出「爸媽放心遊」，往新加坡和馬來西亞等地嘅團費每位約4,000元人仔。攜程網又指銀髮族尤其鍾情深度旅遊或節奏慢啲啲嘅旅遊產品，好似郵輪旅遊。部份郵輪增加特備節目，搵埋滬劇演員上船表演。
內地房地產商亦集中高消費力嘅銀髮族，雅居樂（3383）早前邀請準業主同潛在買家到音樂會，演出歌手係「音樂老師」巫啟賢同羅大佑。瑞銀亦有為私人銀行嘅客戶搞音樂會，前年邀請咗殿堂級歌手林子祥同葉倩文演出，因為佢哋可以喚起客戶嘅集體回憶。
C+B
本欄逢周一刊出