阿里巴巴與騰訊（700）早前為電召的士Apps燒錢，向乘客、司機前後補貼19億元人仔，呢種「土豪式」宣傳手法已嚇退外資，由巴西籍Gustavo Vaz創辦嘅Easy Taxi認為，內地市場太過成熟，被阿里與騰訊飲盡頭啖湯，佢唔敢進軍內地市場，寧願攻打其他亞洲市場。
年僅25歲、樣貌有些少似巴西球星卡卡嘅Gustavo接受訪問時指，中國市場的確好龐大，佢哋喺亞洲已經覆蓋11個國家或地區，包括香港、台灣、泰國、越南、韓國、印度等，冇需要打入中國，跟馬雲嘅阿里與馬化騰嘅騰訊鬥燒錢，「我哋唔會好似佢哋咁使錢。」
Easy Taxi在港除做街客生意，好快做埋B2B。Gustavo透露，計劃向上市公司提供「的士套餐」服務，方便員工搭的士後，唔使畀現金、攞收據、等claim錢咁麻煩，可以直接由公司找數；仲會提供分析報告，畀公司了解邊啲員工claim得特別多錢。佢哋亦跟八達通公司傾緊合作。
不過，香港市場競爭大，又多「85折的士」，Gustavo承認，暫時未達到收支平衡，但平均每日已經有幾千宗交易，暫時最重要係增加客戶數目，提升用戶體驗，佢又提醒大家「其實做85折的士嘅司機，要一路揸車、一路搞咁多嘢（收柯打、分配柯打）好危險!」
Easy Taxi 2011年喺巴西成立，舊年10月進軍本港市場，今年初試過喺鬧市派現金券，司機憑現金可獲回贈；唔經唔覺已經在港補貼幾百萬元。
Gustavo話，至今有22萬人次下載個Apps，共有7,000名登記的士司機，乘客主要以女性為主，因預約前可以攞到的士司機嘅姓名、相片、電話等等，預約時較安心。香港人時間就係金錢，好重視效率，佢指，的士平均五分鐘內就會接載到客人。