日前逛逛由貿發局主辦的創業日，現在香港打工環境麻麻，想創業的朋友似乎有所增加，不過，逛完這個創業日，加上之前睇過電視節目《我要做老闆》，心中總有些恨鐵不成鋼的感覺。直覺上，香港創業者比較多做畫公仔同DIY工藝，從他們的言談，都感受到好大熱誠，但從商業角度睇，似乎創意未足，而呢一步之差，可能就未能觸及tipping point。
之前去台灣見到的新產品，真係一見難忘，好似兩隻手指都托得起的碳纖單車，時髦又實用裝有藍牙耳機的風褸（將風褸帽果條繩變做耳機）；見到這些令人驚喜的產品，好多時自己唔買都會周圍同人講吓啦，咁他們就自然變成了志願推銷員，有人免費推廣，已經啟動了brand building。
南車中鐵有望受惠
談到志願推銷員，最成功的例子，一定數到第一夫人彭麗媛，之前出訪歐洲時，用了中興Nubia Z5 mini來拍照，這單花邊新聞一出，Z5S mini的日銷售量就即時翻咗一番。近期仲有國務院總理李克強都粉墨登場，上星期出訪埃塞俄比亞時考察中國承建的輕軌鐵路工程公司，在炎炎烈日之下，親身上陣拎起士巴拿，同埃塞總理海爾馬里亞一齊擰螺絲，總理還說：「要確保工程質量，打出中國鐵路的品牌，要與非洲共享鐵路建設經驗，分享中國成熟技術……」，雖然感覺係有點Hard Sell，不過最緊要市場受落，你見近期南車（1766）同中鐵（390）的股民，喺大跌市之中都無咁愁，因為擰緊嗰粒螺絲，每擰一下值幾億啊！
鐵路業雖然係國策支持的，但都無理由要出動到總理去瞓身演出，身水身汗為鐵路基建公司護航，其實真正要的，除了打造中國品牌，就是中國的和平崛起同埋中非友誼萬歲，係建設「中國夢」的一個重要部份，所以鐵路基建絕對是「國家級投資項目」。
要省靚中國品牌
講真，如果真係要賣鐵路技術同設備，就算總理出馬，人哋最終都要睇品質同價錢，中國鐵路公司未必次次爭得贏；但係假如sell的是政治影響力，鐵路技術等等只不過是道具，最重要的是，為了爭取政治影響力，中國政府在資金方面係願意出力支持，好似近期埃塞俄比亞政府投資4.75億美元建設亞的斯亞貝巴城市輕軌項目，當中有八成半其實係由中國進出口銀行提供的貸款，對埃塞俄比亞政府嚟講，拎少少錢出嚟就有輕軌鐵路，何樂而不為？幫你建好鐵路，以後大把世界，亦為中國出品省招牌，這亦是中國放棄做世界工廠後的如意算盤，且看中國品牌生唔生性了。不過，最低限度都等三五年，但有些投資者的長線投資係三五日，咁都有選擇的，無巧不成話，中國北車下周招股，谷到咁行，其他影子股就算唔買都要睇吓，唔睇都要買吓啦，話晒總理都幫我擰螺絲做宣傳，就算隻股唔升，我都收貨喇。
不過話時話，內地領導人咁落力去推銷中國的形象，香港政府又為我們做了甚麼brand building呢……又或者佢會講「我唔做任何事情，就已經係最大的配合了」。
張士佳
筆者持有中國南車