時間過得好快，眨吓眼英超嘅2013/14球季今日收爐，之後大家等睇下星期西甲收爐大戰，巴塞大戰馬體會。
去年八月球季開始之前，左丁山貼英超聯賽冠軍大熱門會係曼城曼聯車路士之爭，第四名會係阿仙奴利物浦熱刺之爭，預料曼城與車仔爭冠，曼聯第三名，現在球季結束嘞，只有曼聯令左丁山大跌眼鏡，在新領隊莫耶斯帶領之下，竟然表現失色，攻不銳、守不穩，現在只有63分，排第七名，下季失去參加歐聯嘅資格，金錢損失好慘重，另外諗唔到嘅，就係利物浦三名進攻球員蘇亞雷斯、史杜烈治與史達寧皆表現神勇，入球如拾芥，三星期前重領先曼城排頭位㖭，點知對住車仔，隊長老大哥謝拉特竟然在中場跣腳，俾車仔入波，繼而對水晶宮領先三比零之後，最後十五分鐘連失三球被迫和，於是兩場失去五分，將冠軍拱手相讓俾曼城。今晚曼城主場對韋斯咸，打和都可以憑得失球差攞冠軍，以領隊柏歷堅尼之穩陣作風，冇可能俾韋斯咸突襲成功嘅，況且即使輸咗波都要利物浦主場贏到紐卡素，照睇曼城卜定巴士遊行慶祝奪標都得咯。車仔本有冠軍機會，衰在前鋒無力，伊度奧與托利斯，高峯已過，丹巴巴亞唔夠班，對弱旅就俾對方密集防衛守死，好似輸俾新特蘭、水晶宮兩場失去六分，再在主場與降班隊伍諾域治打和，簡直莫名其妙，否則已可攞冠軍啦。
曼城勝在穩陣，攻守平衡，故此今日可以講話99%篤定奪標，除非足球上帝有意作弄嘅啫，其實曼城今晚不妨索性示人以弱，用摩連奴四二三一雙防中陣式，照計以韋斯咸嘅進攻能力，冇法子攻破曼城大門嘅，但如果採取利物浦教練羅渣士嘅打死罷就，好勝不知輸，一味進攻嘅模式嘅話，一個唔覺意俾韋斯咸中鋒安地卡路頂入一球，然後十人退後死守，曼城就要飽吃驚風散咯。
左丁山朋友之中有不少利物浦球迷，對利物浦在最後三周賽事失分送走在英超第一次攞冠軍嘅機會，佢地幾乎痛哭流涕，因為下一季車路士肯定會增強鋒力，曼城維持，曼聯在新領隊帶領下有機會反彈，以利物浦今天嘅陣容，下季搶到前四名已經夠滿意咯。