黃長興太太Peggy昨日在養和醫院剖腹誕下六磅三B女，榮升爸爸的長興昨在醫院分享喜悅心情，表示女兒出生一刻眼泛淚光：「見到佢嗰吓真係想喊，不過見到老婆都冇喊，所以即刻收一收。想喊係因為見到BB手腳、眼耳口鼻都齊晒，見到咁已經想喊，因為我哥哥個小朋友出世時，眼皮位有胎痣，見到BB白白淨就已經好開心。」
長興表示本想親手為女兒剪臍帶，但因自己只顧為BB拍照留念而錯失機會：「我帶咗三部相機入去，姑娘問我影完未，我話未影好，但可能影太耐怕BB失溫，所以姑娘已經抱走咗佢。」
會改法文名
他指囡囡要住保溫箱，長興嘆謂：「見到佢喊好想抱佢，同佢講唔使驚，爸爸喺度，但因為唔夠暖，所以未抱得住。而我外父外母都到咗幫手照顧太太。」至於BB的名字還未決定，他說：「仲未諗好，都想快啲改好，應該呢幾日會決定，中文名有搵師傅算吓，都會幫囡囡改個法文名，但要慢慢諗，因為有啲法文名轉番英文會唔好聽，怕佢第時俾同學仔笑，所以要慢慢諗。」長興表示囡囡長相跟太太較相似，尤其是膚色，皆又白又滑。
雖然太太剛生B，不過長興已經想再追多個，他說：「會補返剪臍帶，不過等太太養返好身體先，希望可以生個仔，太太自己都話想生三個。」長興指B女出生後感覺自己責任大了，為了BB會減少應酬，亦會盡量多陪太太。」
採訪、攝影：譚倩宜
