「小妖女」喺內地打出名堂之後，果然係越嚟越多人搵佢做嘢，不過關仁早兩日喺北京聽一位女性雜誌高層「果姐」講起，原本約咗小妖女影封面照，但佢開出嚟嘅條件仲勁過泡菜國野蠻女賢姐，嗰本雜誌話頂唔順佢嘅條件，所以飛咗佢唔影！
飲水都指定牌子
關仁好奇，小妖女開咗乜條件咁嚇人，果姐話收到一張要求清單，除酒店食宿全包外，佢要求不可超時、拍攝中途嘅午餐佢要求去某餐廳食，到3點係high tea時間，而high tea飲嘅咖啡同現場飲嘅水都有指定某歐洲牌子，拍攝期間未得佢阿姐批准，唔可以要求影合照或簽名，出入坐乜車、住乜酒店都要指定，果姐話未見過呢啲剛紅嘅妹仔咁大支嘢，所以就索性同佢講達唔到佢嘅要求唔影喇！佢經理人仲要打去嘈！真係唔識死！
撰文：關仁