一連兩晚「鄭多燕萬人熱辣show」前晚開鑼，搞手孫敬安開騷前說要蝕200萬，因為原本計劃每場有五千人，但前晚只有近1400名觀眾入場。鄭多燕前晚雖然表現落力，但昨午她突然於灣仔一酒店召開記者會，炮轟主辦單位安排貨不對辦，令她很失望。
鄭多燕透過繙譯說：「其實我的團隊只係收少少錢，主要係想推廣運動，可以多些人來，但後來知道票價都幾貴，所以影響入場人數。」她認為場地容納1000人最好，太多人都會影響運動質素，稱為「萬人show」就太誇張，她表示主辦單位原本說好有的旋轉舞台及大銀幕最後都沒有，令她感到十分徬徨。
鄭：票價都幾貴
身為搞手的馬天尼老闆孫敬安，昨在電話中反擊鄭多燕說：「我蝕本都從來冇話任何人，我仲喺facebook讚佢專業，話我啲票賣得貴？韓星個個都賣過千蚊，我主要都係賣480同320，後尾團購重賣288同188，一樣唔賣得，根本就唔關貴唔貴事！由頭到尾我都冇賴佢，佢噚日（前日）唔肯做訪問，我都有幫佢喺記者面前打圓場話佢隻眼唔舒服，佢𠵱家咁對我，我咪死得好冤枉？」
孫：踩人唔應該
鄭多燕投訴貨不對辦，孫敬安指旋轉舞台是他提議在先，但鄭多燕擔心旋轉時舞台「窒窒吓」，跳舞時若跌低會好危險才打消念頭，而沒有大銀幕則因觀眾少沒此需要。孫敬安說：「佢年紀大，要保護自己聲名，但咁踩人真係唔應該。佢根本係無理取鬧，總之公道自在人心。」而昨晚尾場亦只得近千人入場。
採訪、攝影：卓寶花、陳志嵐、溫敏芝
