有啲人物，你總會喺某年某日諗起佢。雖然大家已經冇轇冇轕，佢唔係你嘅正選，甚至唔係後備，但係因為曾經一齊行過人生嘅一段路，所以你認為你嘅前度，應該永遠都對你咁好，隨傳隨到。
感性粉絲嘅最大弱點，就係將人生浪漫化。喺充斥住前度嘅足球場上，其實我好懷疑球員們究竟有冇「念舊」呢個概念；講波嘅同事開口埋口好鍾意用「母會」呢兩粒字，咁啱今日係母親節，若果有媒體搞番個「邊間係你嘅母會」調查，恐怕癡心一片嘅球迷會答得快過一班球員好多。「有奶便是娘」你聽過嘞啩，「東家唔打打西家」啫大佬。
韋斯咸隊波冇嘢多，係特別多情，面對唔知點解特別多嘅前度，成日都會表錯情。家陣鳥倦知還嘅祖高爾，本來係球隊近年青訓嘅代表作，點知一轉會去車仔就話自己由細到大都係車仔fans；到佢年老力衰時，韋斯咸又會即刻收番佢喎，不計前嫌情牽一線，呢啲真係母愛嘞。
里奧費迪南就快退休，韋斯咸前排即刻放風話歡迎佢返嚟收山；嗰頭里奧聽見，即刻話若果一離開曼聯就唔踢嘞，慌死益咗韋斯咸。又有位林柏特，因為老竇同韋斯咸分手反轉豬肚，每次返到烏普頓都俾人噓到暈；點不知越噓得勁，佢就越射得應喎，呢啲愛人變仇人嘅前度先最攞命。
韋斯咸前度只得一個係真正甜心－－－無論係着住曼聯定曼城波衫，泰維斯都會自動收油，仲次次扮「老抽」，提早出場做埋槌仔手勢；若果佢仲喺曼城，今晚真係唔知點收科。所謂前度，喺足球場上真係恨多過愛，利記fans應該好明，你睇吓格連莊臣對親韋斯咸都入世界波就知啦。不過，大家又唔使擔心安祖卡路爾會唔落力，因為佢得番今晚去爭取成為英格蘭嘅「plan B」，隨時會撞散赫特先收科。
韋斯咸今季3遇曼城，平均每場失4球，今場輸少當贏啦。幻想卡路爾可以絕殺入波？就好似青春期嘅一場夢遺，瞓醒就知幾無謂。
KEYMAN
now TV主持