球季近尾聲，唔少英超球會都趁呢幾日搞年度頒獎禮，唔知係咪曼聯喺今季成績麻麻，周四球會晚宴唔少球員都單拖赴會，好在仲有雙料最佳球員得主迪基亞拖住火紅女友，以及基斯史摩寧帶埋省鏡嘅另一半嚟撐場。艾舒利楊格女友妮姬就靠奇峰出位，透點到場。
傑斯獲頒終身成就獎
臨別在即嘅傑斯，喺周四曼聯頒獎晚宴獲頒終身成就獎，佢都話好感動：「呢個係我畢生拎過其中一個最特別嘅獎項，曼聯對大家嚟講唔只球會咁簡單，仲係一個大家庭，曾經有過好多出色球員喺度效力，能夠獲得呢個獎實在係非常感動。」
另外傑斯亦提到受肩傷嘅菲爾鍾斯以及朗尼，預計都可以趕得切出戰世盃決賽周。
而門將迪基亞就獨攬由球迷同球員選出嘅兩個年度最佳球員獎項，平心而論，今季曼聯表現最穩定嘅都算係呢位西班牙門將，冇佢曼聯𠵱家排名隨時更低，都抵佢攞獎嘅。迪基亞話：「今季可能係我個人表現最好嘅一季，令我充滿信心，期待下季可以保持水準。」
着閃紅戰衣艷壓WAGs
迪基亞今次帶埋女友艾杜妮出席，呢位西班牙歌手着住閃紅deep V裙嚟踩紅地氈，相當搶鏡。同樣有帶女伴嚟嘅仲有基斯史摩寧，佢女友曲姬一向以身材好見稱，佢一樣着紅裙到場，吸引程度同樣唔低。至於艾舒利楊格嘅「豐滿」女友妮姬，就靠另一殺着搶鏡；妮姬不拘小節着條好薄嘅連身裙，薄到睇到晒裏面，西人係豪放啲，冇乜所謂喇。
除咗傑斯同迪基亞之外，晚宴上仲有其他獎項。曼聯喺3月英超作客2:0贏韋斯咸，前鋒朗尼包辦兩個入球，其中超遠距離入球就獲選為曼聯今季最佳金球。而喺上場聯賽先首次代表球隊喺英超上陣嘅占士威爾遜，就成為本年度曼聯最佳青訓球員。除此之外仲有小將贊高當選預備組最佳球員。
