用「耳燭」清理耳垢大家就聽得多，甚至可能試過，但原來係好危險o架！翁靜晶前晚就喺facebook發咗一個post，話自己冇上兩日facebook，係因為一宗可怕嘅意外，而罪魁禍首就係…「耳燭」。
話說翁靜晶不嬲都有用「耳燭」去清理耳垢，一直都安全無事，但大前日朝，就出現熔蠟倒流。痛之餘，翁靜晶仲話聽覺有少少受損呀。翁靜晶起初都冇諗住去睇醫生，但覺得異物愈來愈阻礙聽覺，加上同阿女講咗之後，就決定即刻去睇醫生喇。醫生一睇，就見到入面果然有一大片嗰啲熔蠟，無奈的是醫生唔係耳鼻喉專科，要等轉介。
等多一日之後，翁靜晶就去咗睇專科醫生，殊不知醫生一睇就話翁靜晶係第N個因為耳燭出意外的病人；醫生仲話其實被抽出嘅耳垢係掩眼法，實情係熔蠟嚟。最後，用咗半粒鐘，又用鉗子夾、又用藥水浸、又用吸塵器吸，好唔容易先拎番兩片熔蠟出嚟。而因為個手術觸及到耳膜，所以連女中豪傑翁靜晶都話好唔舒服同好痛呀！