中學有恢復讀古文之議，中文科文言範文會在明年九月起在中四級推出，共十二篇，包括「出師表」、「六國論」、莊子「逍遙遊」等，左丁山一代讀中學時，就讀過呢啲文章，不過嗰陣時左丁山之中文老師第一要求我地背書（如背誦「贈白馬王彪並序」），第二係要求我地逐句解釋，現代教法係點樣呢？據星島日報（五月五日）訪問老師及補習社所知，八十後九十後嘅年輕中文老師可能唔掂，蕭若元正與人合作攝製範文教學短片，俾老師溫習吓先喎，補習社仲教埋學生睇電視片集諸葛亮以引起佢地讀「出師表」嘅興趣㖭，左丁山之中學中文老師如在泉下有知，不知好嬲還是好笑。
金融精英M飽讀英文書，批判性思維強烈，推理邏輯好到冇得頂，抵佢升上高位，但自強國人崛起後唔識中文就吃虧無數，精英M當年考會考，中文攞過良（左丁山只考到D），但對古文係有限公司，佢問左丁山：「你話不及黃泉無相見，其實到咗黃泉，大家都死咗喇，仲鬼有得見咩，鬼見鬼呀？」
咁又唔係，「鄭伯克段于鄢」文內，鄭莊公搞掂細佬段之後，將平時寵愛細佬討厭自己嘅阿媽姜氏流放於「城穎」，又發誓話：「不及黃泉，無相見也。」講完就後悔，點算好呢？一位大臣穎考叔知道之後，求見莊公，獻計曰：「掘一條地道，深至見地下泉水，大家咪在隧道相見囉。」莊公依計行事，入地下隧道與母親姜氏相會，不算違背「不及黃泉無相見也」嘅誓詞，母親大樂（所以有「樂也融融」，「樂也洩洩」（舒散也）之句），母子和好如初。
穎考叔諗出呢條黃泉秘密通道絕橋，馬英九學咗一啲噃，據台灣一啲報導，馬英九主理海峽兩岸嘅溝通，談判之初就訂立「專案」跟進，專案就叫做「穎考叔專案」咁話，外人不識中文，識少啲古文嘅話，都唔會明白甚麼是「穎考叔專案」，識得嘅話就會明白馬英九與北京想建立一條秘密通道，「在黃泉相見」。精英M聽完左丁山講古仔，大嘆自己讀得古文少，上到北京上海，可能俾人暗中取笑都唔知，但依家惡補都嚟唔切啦，左丁山叫佢無謂現在花時間讀古文咯，不如搵本Thomas Piketty讀吓，仲追上時代，可與紐約巴黎同行溝通溝通啦。