年年如是，明天迫完茶樓或者歎完自助餐後，母親大人，不妨應節諗吓，好不好這樣：
一，叫只是念小三的阿女停操TSA試題，保證她會開心記得母親節，更希望每個星期日，都是母親節。
二，雖然你怕出雀斑，亦唔明白一班波牛追住個波無聊短傳有乜過癮，但明日試吓在場邊唔打機唔上網唔apps一個半鐘，睇吓個仔點樣扭波。孩子大得快，以後的母親節，別以為還有機會啊。
三，谷鬼氣說過「生嚿叉燒好過生你！」的母親，百分百會後悔。因為，叉燒好味極也不會有叉燒節。經過燒臘店，被你詛咒而漸漸變成豬扒的阿女，見到肥叉燒，只會恐懼痛哭，唔會思念你這個惡叉媽。
四，迫阿仔念慈母詩，無feel，不如交換身份，明日，你晨早操水兩小時奧數個半鐘小提琴一粒鐘，傍晚上英文雞精班一小時，晚飯後私人補習普通話45分鐘。睡前，阿仔哭着說：「媽媽你真偉大，每個周日無論多累都會做facial，最要命是修腳甲！媽媽，我不想交換了，讓我做番自己嗰份吧。」