為咗拎冠軍，馬刺可以去到幾盡？上圈對小馬，馬刺就曾經6打5，到次圈對拓荒者，馬刺就玩放蛇；NBA季後賽西岸次圈第2仗拓荒者作客馬刺，賽前客隊更衣室驚見毒蛇，成班拓荒者球員當堂嚇到失晒魂，結果馬刺順利以114:97大勝，場數領先2:0。
慌失失大敗17分
拓荒者大軍周四晚如常步入AT&T球場，準備次回合嘅第2戰，前鋒T羅賓遜坐低準備換鞋嗰陣，發覺衣櫃入面有堆物體，蜷縮埋角落頭，睇真啲仲識郁，原來竟然係條蛇，嚇到眾人大叫；前鋒巴頓就話：「T羅賓遜大叫有蛇，起初我以為佢講笑，點知係真！」昂藏7呎中鋒R盧比斯就話驚到想瀨尿，控衞莫威廉士就最大膽，影低蛇相仲放上Instagram㖭，話馬刺更衣室有響尾蛇，最後勞煩保安捉走條蛇，而馬刺官方之後證實條蛇冇毒，而且係野生，唔係有人故意放入更衣室。馬刺之前都試過有蝙蝠飛入球場，要麻煩真路比利活捉，今次有蛇都唔出奇。
不過點到好，拓荒者開波前俾條蛇嚇一嚇，當堂就腳仔軟，上半場竟然已經畀馬刺轟入70分，落後成19分，雖然拓荒者第4節力追，一度只落後9分，不過馬刺由尼納特及真路比利各入3分，再度拋離，以17分大勝，領先至2:0。馬刺歷來領先2:0嘅系列賽，只有兩次被逆轉出局，睇嚟普波域治真係可以準備定西岸決賽對雷霆或者快艇嘅部署。
熱火再贏2:0領先網隊
上季總冠軍熱火亦都清風送爽，周四主場對網隊，憑勒邦占士攻入22分，加上阿倫第4節3分波發威，以94:82擊敗對手，同樣場數領先至2:0，熱火延續季後賽6連勝走勢㖭！
