去年3月，佔中三子在九龍佑寧堂的十字架前，以近乎起誓的方式發佈信念書，有人問，「嘩！佈道會咩𠵱家，想點？」上月27日獲教廷冊封為聖人的先教宗若望保祿二世，促成波蘭團結工會，對抗極權，隨後引發共產黨瓦解的「蘇東波」，結果在1981年遭疑似蘇聯槍手襲擊。無神論的共產黨和相信人人生而平等的基督宗教，歷史上從來站在對立面。在2014年香港爭取普選的重要關頭，基督教會對佔中出現了兩派極端，《蘋果》邀請代表不同意見的神職人員同場討論，為信與不信的人解惑。
記者：張嘉雯
陳：天主教香港教區榮休主教陳日君樞機
管：聖公會教省秘書長管浩鳴牧師
朱：和平佔中發起人朱耀明牧師
記：《蘋果》記者
記：
教會支持公民抗命嗎？
陳：
爭取民主時，教會爭取優先用和平方法，對話、言論，事實上好多次爭取民主、人權，未必用對話成功，對話肯定要兩邊有誠意㗎嘛，如果一邊完全唔肯讓步嘅呢，對話唔會成功，喺用晒對話方法後，咁可唔可以用啲其他比較所謂激進啲嘅方法去爭取呢？
教區聲明話要繼續以對話爭取，萬一對話爭取唔到，可唔可以做啲比較激進啲行動呢？教會訓導話可以㗎。喺教會天主教教理情況下，甚至一個最極端處境呢，用暴力都可以㖭，呢樣我哋天主教教理裏面有，咁當然有好多條件啦，但我哋絕對唔覺得到咗呢個地步。
教區聲明話，如果對話唔成功，某些人可能會考慮（佔中），呢個文件都話呢，係可以考慮㗎喎，根本完全照教會啲文件係可以考慮，咁嗰陣時點做呢？教會都好謹慎，嗰時就大家照自己良心去做，絕對唔應該強迫任何人做。
公民抗命，唔係等於話任何嘅犯法行動，係為咗一個更高嘅目標，去違反呢個法律，所以教區副主教都解釋，犯法唔等於話犯罪，有時犯法係可以接受嘅，甚至有時係好需要嘅，使我哋更加能夠保護法律嘅、得一個公道嘅法律目標呢，但違反法律嗰時，當然都要接受呢個懲罰㗎喇。
記：
各大宗教已有共識？
陳：
我就覺得呢，如果出嚟話，六宗教之間有共識反對佔中，咁就唔啱喇，因我哋天主教已經講咗呢話可以考慮㗎嘛，所以，我就唔係好贊成呢個六宗教喺新春賀詞度講咗啲說話，雖然佢冇講佔中呢兩個字，但好明顯係批評佔中，甚至話係好野蠻嘅行動嗰啲咁嘅嘢，咁我覺得係唔啱嘅，因為教會嘅聲明出咗好耐啦，大家都睇過喇，如果六宗教咁講，係咪批評我哋天主教呢？係咪將我哋嘅湯漢樞機當佢少數呢？
管：
樞機頭先講呢，我講嘅宗教界呢，就唔係大家所講嘅六宗教，主要講係佛教同道教，我哋有傾過吓偈，當然唔係講緊六宗教嗰個文件有關係，因為我本身都唔係同六宗教對談當中有任何特別參與。正如頭先樞機講得好啱嘅，有教友有部份覺得佔中係有問題嘅，我覺得，就住我個人都代表一種聲音，唔好話似乎教會入面係得一部份嘅聲音比較多啲。
𠵱家有個困局就話，佔中可能就會成為咗一個，講緊一個籌碼問題啦，呢個都講過好多次㗎，問題就我個人覺得，作為宗教人士，我自己就呢個少少覺得唔係太過接受得到嘅bargaining嘅方法。佔中個口號嚟得比較早一啲，當然話就話唔想做，不過又似乎畀人嘅感覺，好似類似一啲要脅呀，或者攞香港嘅經濟嚟脅持咗。
我估全世界都冇試過喺香港一國兩制下有個咁普選嘅情況，容許過程中唔係咁符每個人嘅心願，我一路都覺得最好有一個檢討機制，讓大家都能夠睇咗一次2017實質結果係點樣，再進行下次檢討，咁會大家理性一啲，因為𠵱家大家都好多猜度。
最唔開心係社會撕裂，宗教界就更加，連教會都係，為咗一個議題，本來呢個議題就唔應該嘅，因為正如《聖經》所講，冇一樣嘢可以使我哋與基督嘅愛隔絕，難道係普選嗎？
朱：
似乎管牧師未能理解和平佔中所設嘅一個步驟，個步驟就係透過商議、公民授權、對話談判，然後先進到去和平佔中，所以話議題太早，其實係一個好大過程嚟，過去一年都喺商議當中，呢次和平佔中開創咗民主政治文化先河，一班人坐落嚟，會傾吓爭取民主嘅國際標準係乜嘢呢，我哋所期望嘅政治制度發展係乜嘢呢？係有幾百人，甚至上千人討論呢啲議題，呢個係開創咗歷史。管牧師，社會撕裂，唔係因為和平佔中所以出現撕裂，而係政府本身，造成社會分化。
你睇吓呢幾年香港嘅發展，喺呢一次嘅特首選舉所出現嘅撕裂，唔係因為和平佔中，而係政府誠信、僭建，種種問題所出現，呢種誠信管治嘅失效，反映呢個政府係冇人民支持。
雖然我已經退休，每想到教牧同工，或者神職人員，面對今日一個社會，一個撕裂社會，一個不公平制度，其實我哋有乜嘢可以做呢？以賽亞書第56章第一節，六個字，我一生堅守住，守公平、行公義，唔同社會有唔同處境，採取唔同步驟去處理，但無論點，守公平、行公義，係無法妥協嘅地方。
我覺我哋教會，包括我自己，我唔會故意地去攻擊一個政權，亦唔會完全去信從一個政權，因為政權同執政掌權者，都只係上帝僕人而已啫，我哋同佢都只係在上帝管治之下，每個人都係尊貴、平等。
耶穌基督最後一句說話，愛神、愛人如己，在律法嘅總綱下，我哋今日主張人權嘅時候，其實係從愛人如己發展，所以曾經有言論話，除非生命同信仰受到威脅先可以進行公民抗命，其實現時我哋就應該進行公民抗命：溫州教會被清拆、我哋嘅弟兄同工被囚禁、我哋嘅同胞得到諾貝爾和平獎時被囚禁、妻子被軟禁，愛人如己，唔係單單係自己，別人所受嘅痛苦、艱難，都要我哋需要憐恤、同情，同去爭取，有人話愛神同愛人如己，就係基督徒嘅共同宣言，為弱勢社群，為今日面對嘅政治懸崖，挽回政府管治威信，先係有效解決方法。
有一首詩，我成日都用嚟警惕我自己，係一位流離失所嘅婦女，去到教區尋求主教幫助，無所依靠，但最後教會冇理到佢，所以佢離開個地方，寫咗個心聲：
「我餓了，你組織人道協會討論我的飢餓，
我入獄，你悄悄地進到聖堂為我得釋放禱告，
我赤身，你在心裏議論我的外表是否不道德，
我生病，你跪下感謝神賜你健康，
我流離，你向我傳講神的愛可成為靈裏的蔭蔽。
我寂寞，你離開我去為我禱告。
你似乎極其神聖，與神十分親近，但我仍舊非常飢餓、寂寞、寒冷。」
和平佔中，唔係佔，係透過商議、公民授權、談判、對話，都失效喇，所有努力都失效喇，然後先會啟動佔中，今日已經過咗年幾喇，我哋仲喺商議之中，希望可以解決現時爭議。
陳：
其實我哋呢作為教會人士嘅身份，唔會驚冇飯食，但係我哋唔應該咁諗㗎嘛，我哋教宗方濟呢好犀利喎，佢同我哋神父講，你唔好留喺聖堂裏面呀，行出去呀，係呀，嗰啲最需要幫助嘅人喺出面呀，你哋要睇清楚啲呀，邊啲人最淒涼，你去幫佢呀。我覺得一定要出嚟做啲嘢，要有啲聲音，我哋係可以有聲音嘅人，如果冇聲音呢，係對唔住自己，對唔住下一代。所以就算我都82歲㗎喇，應該可以享福喇，不過我都覺得有啲責任，我哋唔應該放棄嘅。
管：
我完全明白朱牧師睇法，不過我都係嗰句，我覺得就嗰個先後嘅問題好緊要，頭先朱牧師所講有好多過程，但係如果一開始就用和平佔中個名……不過𠵱家都返唔到轉頭啦，如果日後有咁嘅機會呢，我希望朱牧師佢哋可以研究一吓，會唔會唔好一開始用呢個名呢？
個名改得唔好，就會將個行動扭曲得好犀利，一開始用和平佔中個名，同埋一路嘅口號當中都話，如果傾唔掂就會做一啲嘢，咁我個人良心上，覺得呢一個道德有啲界線上面……我情願就話你單獨去傾，傾唔到之後你決定點樣做，你唔需要講出嚟。
嗰樣嘢究竟犯法唔犯法，我覺得尊重唔同人嘅做法同埋意願，不過如果用作為一個bargaining chips，或者一個交換條件呢，我自己嘅睇法，當然呢個係一個社會行動可能背後會需要咁，不過我個人就覺得教會就唔應該咁。
我都再強調，希望我能夠代表到教友嘅聲音，因為佢哋的確覺得教會喺呢件事上面，某程度唔應該用佔中呢個方法去表達，其他方法呢我哋冇問題嘅，甚至你話遊行呀、絕食呀任何方法我哋都覺得支持，因為人有人嘅權利，不過佔領中環背後，我情願大家去佔領維園喇，咁佔中始終同香港嘅經濟、同埋秩序，對社會嘅影響比較大。
陳：
希望啲教友就算幾忙呢，都要跟住香港嘅新聞，主要嘅新聞，𠵱家話聽到佔中呢，呢個名已經嚇驚人喇，咁其實呢個名出咗好耐啦，咁佢都好多次解釋啦係嘛，好多解釋希望啲教友都去睇吓，究竟發起嘅人想講乜嘢，佢哋會明白佔中原來唔係咁可怕喎，𠵱家香港嘅情形、國內嘅情形，都跟住喇，就算有啲人好忙，搵飯食，都唔可以疏忽呢個問題喇。
後記
追求民主和公平的制度不是教徒的專利，但十字架的犧牲精神，一直是無神論政權最害怕的，心裏有另一個「主」或更崇高的價值、把回報放在生後的人，要用甚麼來收買呢？政治博弈不是有信仰者的強項，他們的最大能量，是透過宣道轉化人心，透過犧牲去感動那怕是最心硬的人。三個神職人員的訪問，儼然是三篇精采的講道，中間隱然冇火藥味，更多卻是苦口婆心的勸勉，不要撕裂、走出去、神的律法才是比較大、威脅是否不道德……必勝的策略無人知曉，訪問破天荒以祈禱告終，在爭取普選的危急關頭，對不信的人，爭普選此刻需要的，是集體信念創造出來的奇蹟；對信的人來說，要當權者醒悟，唯一可以依靠的，無疑是祂的力量。