今年的頂級電視賣點都不外乎兩樣，一是曲面，二是UHD 4K，雖然對家Samsung前排就率先推出兼具兩項賣點的Curved UHD TV，但LG就一於少理，在香港先發佈一系列平面UHD電視，純以畫質吸引用家。LG Ultra HDTV系列包括了65吋的65UB9500及55吋的55UB8500，新機加入了Triple XD Engine，能有效提升色彩、對比度和清晰度，現場睇當然清到無倫，色彩亦非常出色鮮艷。加上可視角闊達178度的ULTRA IPS Panel，坐側啲都睇到超高清靚畫面。
兩款機型都設有ULTRA HD Engine Pro功能，可以把不足4K解像度的影片重新處理至近4K的質量。新機未有公佈定價，望就望佢平啲喇，讓我可以快一點進入4K新時代嘛！
webOS界面萌爆雀仔導航
Ultra HDTV除了大賣靚畫質，還花了不少心思來提升用家的使用感。新機加入了最新的webOS界面，最有趣莫過於加入了一隻叫BeanBird的可愛雀仔，可幫用家Setup電視。
現場試玩，一開機BeanBird就會教你各項設定，中間亦加插了不少可愛動畫，相信絕對可以令不少電器白痴都可以無痛Setup。而到真正使用時，遙控器會在畫面上現出如滑鼠的浮標，方便控制。用家可隨時call出畫面底部的掃動式菜單Launcher，開啟應用程式或其他影音連接。另外，Live Menu就可在看電視時，查閱其他節目建議，預覽其他頻道等，可以搵搵有無其他好選擇。
特別一提，新機內置了4K HEVC解碼器，可直接經網上串流、USB或HDMI 2.0播4K影片，無謂買咗新電視都仲要睇《西遊記》喇。
