「丁屋政策，係時候了斷啦」、「十幾萬個丁權，能建十幾萬套豪宅」……近排《竊聽風雲3》電影海報同預告片陸續面世，唔少香港人都大呼過癮，因為其中唔少角色以新界鄉紳做背景，仲喺海報寫明「香港土豪全員集合，走出新界，稱霸宇宙」，盲嘅都知套戲影射緊邊班人啦。
噚日上水鄉事委員會主席侯志強一如以往戴住黑超現身，同埋北區區議員李冠洪齊齊向記者介紹新增商場做邊境購物點，疏導旅客嘅發展大計。
有記者提起《竊聽風雲3》用土豪形容鄉紳，黑超強即時霸氣盡現，話新界人係土豪係一般人嘅誤解，仲拋出金句話：「有錢唔一定係豪，着衫又點先叫老土？」佢話就算係咪影射，大家都唔使咁認真，電影橋段梗係吸引眼球㗎啦，未必係事實嚟喎。
中英街改造成購物點
講返黑超強個大計，喺發展就是硬道理嘅指導思想下，佢建議喺上水港鐵站同上水廣場之間個小巴站，加建四層高購物商場，又建議上水第30區舊工廈改建做商場或者酒店；羅湖站邊境禁區預計會喺2015年開放，佢認為可以喺周邊土地發展邊境購物點，而沙頭角墟、中英街就可以按國家副主席李源潮早前透露嘅「旨意」，開放改造成另一個邊境購物點。
強哥話，邊境起多幾個商場，理應可以舒緩到市區逼爆情況，減低對港人日常生活影響。不過咁樣會唔會對已經飽受「摧殘」嘅北區居民好唔公平？佢話暫時未聽到區議會有反對聲音，「相信即使有都唔多」。
嘩！搬出領導人同你開路，強哥嘅發展大計，可以話遇佛殺佛啦，直頭可以「走出新界，稱霸宇宙」啦！
mailto:[email protected]