人民幣長期單邊升，好多香港人都將部份儲蓄轉成人民幣，最近回軟多波幅，相信最多人關心人民幣走勢會點。估人民幣點走要先解決係咪濫發嘅問題。上一篇提過可用貨幣角度睇GDP，亦即MV=PT=GDP。2013年中國GDP增長7.7%，56.8萬億元（人民幣．下同）；M2增長13.6%，110.6萬億元。M係貨幣，V係貨幣流速，PT係總價，從上述數字可以計到中國嘅V大概係0.5至0.6。貨幣流速嘅意思就係錢嘅轉手速度，如果貨幣轉手速度好快，即經濟活動頻繁，咁經濟通常好。美國嘅貨幣流速破緊底，但都有1.5至1.6，相比下中國貨幣流速太低，係中國要印特別多錢嘅真正原因。讀銀行制度比較知道英國最領先，美國落後英國3至5年，日本落後美國5至10年，中國落後幾多？中國過去30年經濟爆上，融資渠道太少，所以集中晒喺銀行借貸上。當然另一個原因係有中國特色嘅樓市問題。如果經濟活動減低，錢嘅轉手次數少咗，GDP自然就跌。V通常被當作常數，咁就產生一個問題，如果GDP要保持7%，即係M2要每年13%增長，係咁印錢人民幣仲有冇得升？（待續）
註：作者為《地利根德閣》blogger，
著作有《樓市撈底攻略》
Mr. Tregunter
本欄逢周五刊出