呂珊前晚喺灣仔伊館開騷有唔少圈中人捧場，有啲仲係久未露面嘅上岸藝人，好似發福嘅文雪兒、尹光同一班離巢大台嘅幕後製作人都有畀面出席。呂珊前晚仲請到鍾鎮濤（B哥哥）做嘉賓，B哥哥上台俾珊姐追問佢幾時結婚！佢就解釋：「係美麗嘅祝福，同美麗嘅盼望。」演唱會後，B哥哥冇接受訪問，珊姐就代答：「我梗係有問，不過佢話忙到冇時間做自己嘢，所以未知幾時。」
鳴謝亞洲電視
演唱會特別鳴謝亞視，安德尊上台揶揄呂珊話：「我頭先見到亞洲電視全力支持，嘩！嚇到我腳軟。」似乎有意影射呂珊係叛徒咁喎！搞到場面尷尬，呂珊上台急急解釋話：「佢真係汪汪（指安德尊係狗），成日上台亂噏嘢，因為個騷有個MV係亞視版權，咁環星老闆就想出番個名俾亞視，與我無關。」
撰文：馮仁昭