打工仔得閒就會諗，究竟儲落幾多錢先至可以喺65歲退休後實現安穩生活，AXA安盛生活指數噚日出爐，發現港人覺得有536萬元就夠，較舊年相同調查減少28%。AXA安盛首席市務及策略總監黃瑞雯估計，由於港人越來越注重精神與身體健康，冇咁重視物質，所以將個人財富睇淡咗少少咁喎。
之前有個廣告話，養一個小朋友要有400萬元先得，篤下計數機，如果65歲退休後，仲有25年命嘅話，儲落536萬元，每個月有1.7萬元可以慢慢搣。若然已經供滿自住單位，唔使交租，生活十分簡單，冇乜病痛，呢個數應該可以令人過安穩生活嘅。如果想過豐盛生活嘅話，港人就話要755萬先得，都比舊年跌四成。AXA呢個調查係今年3月透過網上問卷訪問1,004人得出結論，金額屬中位數。