「夢如人生，快樂永記取，悲苦深刻藏骨髓」
—《每當變幻時》
多得彭浩翔和《春嬌與志明》，令楊千嬅冠上影后頭銜，演技得以昇華至另一層次。今次她要扮演活在痛苦的女人，因年少無知，誤以為亡母厭惡自己，這淌血的傷口，直接影響身心健康，悲苦深刻何止藏骨髓？千嬅受訪時說：「以前冇遇過啲角色咁深層表達一啲抑鬱嘅嘢，通常我好開朗，今次唔能夠好『造』（造作），如果唔係會好怪，佢係思覺失調，唔係真係一個癲嘅人，要崩潰都係唔同層次，咁點樣做呢樣嘢係要溝通。導演好好，相信佢同每個演員心理輔導咗好耐，成件事嘅表達係點樣，咁我就搵咗個啱嘅tone，最好志偉係我老公，佢咁有經驗，可以帶動我去入戲。」
不過，千嬅最欣賞還是志偉的「床上功夫」！當日他跟新人蔡潔埋身肉搏，場面辛辣刺激，千嬅說：「好勁！原來佢（志偉）好勁，床戲囉！一開始幾勁，導演化解嗰樣唔係咁色情，好叻拍到嗰件事出來，佢唔係用情慾，係拍件事出來，同埋我覺得蔡潔好勁，作為一個新人，第一次拍戲，佢好relax，好放呀！」
帶囝囝認識世界
提到戲中古天樂嫌棄女兒醜樣，竟然懷疑是否自己的親生骨肉，身為Torres媽媽的千嬅搖搖頭說：「嘩！好hurt呀！比我起咗圍喇！比着我老公死咗啦，一定死，即刻死得好慘。唔好話彈，無端端有個人行埋來大聲同我個仔講聲，我即刻衝埋去問佢乜嘢，你嚇親個細路仔，我會嘈喧巴閉。」
虎媽千嬅奮不顧身保護愛子，但在適當時候亦會放手：「好似UNICEF一定要去，佢唔望一望，唔知呢個世界原來係咁。」
撰文：楊潔雯