「人生與命運，原是一天百變。」
—《變色龍》
無疑，《香港仔》是一碗充滿香港情懷的地道車仔麵，負責推車仔的，正是導演彭浩翔。
彭導以三條主線包裝香港家庭倫理故事作麵底，加入甜酸苦辣刺激視覺感觀的佐料和餸料，上枱前還輕輕灑了點鹽花調味，帶出彭式車仔麵的獨有特色。
彭導聽到「彭式車仔麵」一詞，先感到錯愕，再點頭說：「呢個城市係咁，樣樣有啲，自助餐嚟㗎嘛！睇到我想將好多感覺放埋一齊，由故事內容到拍攝手法都係，有啲靈異……」
樣樣配料都放進麵裏，難免會雜亂，但彭導自信拍到預期效果，堅持《香港仔》的故事要包羅萬有：「每條線都好強，你講咁多人嘅故事好困難，其實有投資方建議不如拆成兩部戲啦！夠做兩部戲嘅卡士。不過，我堅持放咗喺一部戲。」他承認以全新手法烹調車仔麵：「人都大咗，以前唔關注家庭問題，呢幾年想寫關於家庭嘅主題，每個人有好多自己嘅煩惱，一家人嘅煩惱係互相交纏，所以寫咗一部咁嘅電影。」
以家庭倫理為題的作品，有激烈的做愛場面；巨型蜥蜴在紙紮北角經過；一家總動員搶救擱淺鯨魚，彭浩翔解釋：「拍一個家庭文藝片，唔代表一定要拍得好沉悶，每個人內心有好多暗湧，正如個小朋友死咗條蜥蜴，佢嘅夢想世界好奇幻，咁點解電影唔將佢拍出嚟，當然有時冇資源拍唔到啦！但今次好幸運，有好多演員支持，又得到投資方支持。」
彭浩翔變了，變得對生命更加熱愛。人生與命運，原是一天百變。