「是他也是你和我，同悲歡喜惡過一生」
—《狂潮》
還是吳孟達最坦白，62歲的他離開香港電影圈16年，為的就是一個字——錢。
哪管你姓甚名誰，甚麼名導、大製作，達哥都不屑一顧，他「三叔」上身說：「最緊要價錢靚，時間啱。大陸乜都有，垃圾嘅有，洗黑錢嘅有，暴發戶攞錢出來捧女朋友場嘅有，唔憂冇得拍，拍部戲出來衰，起碼我收番咁上下價錢，條氣都順啲。同埋𠵱家大陸行行都唔係咁好，剩係我哋呢行特別好，之前套《泰囧》、星仔套《西遊降魔篇》，發仔套《大鬧天宮》都七億八億，大有大製作，細有細製作。」
唔知彭浩翔乜水
你說達哥拜金？他偏偏拍套《香港仔》，純粹支持本土製作：「咁耐冇拍香港戲，呢度傾掂咗唔使我報稅，佢哋當畀利是我，加上同時間喺香港有兩部搵我，我咪當留喺香港休息吓，多啲見屋企人呀、朋友囉。」原來最初達哥不知道彭浩翔是誰：「第一次搵我嗰時，彭浩翔邊個呀？乜嘢《低俗喜劇》，我問乜戲來㗎？由98年開始冇喺香港拍，最後嗰部係《少林足球》，都十幾年，完全未接觸過，唔知乜嘢style，咪問朋友搵吓資料，問人佢啲戲點，我自己又唔鍾意睇戲，啲人話佢啲戲都幾過癮。跟住同佢接觸講個古仔我聽吓，都有少少吸引力喎！」
拍完之後，對彭導又有何評價？達哥不偏不倚：「另類啲，港味重，好少人拍。」之後再給彭導溫馨提示：「大陸市場都好緊要，淨係香港唔夠，佢幾有諗法，我諗假以時日，過多一兩年，再拍多一兩部，一定好成功。」