電盈（008）小股東大聯盟代表陳仲翔噚日喺股東會又有出位表現。佢向主席李澤楷（Richard）「獻策」，建議電盈同騰訊（700）合作，兼且帶埋小道具，做咗公司logo，提議呢間公司叫做「騰訊盈科」，英文名「PQQW」。查實呢位陳生不時提出天方夜譚嘅建議，最誇張咪叫Richard搵股神畢菲特入股囉。
不過噚日佢真係太長氣，搞到Richard忍唔住要笑住寸佢，問佢「你係發表演說，定係發問？」之後認真咁回答，指電盈、騰訊兩間公司冇相關業務，唔會為合作而合作，浪費時間金錢。其實都唔怪得Richard話佢，Richard喺騰訊上市前曾經持有兩成股份，可惜持貨一年，賺6倍就沽出，冇等到騰訊升到幾百元先沽，賺少好多。陳仲翔叫佢同騰訊合作，擺明要勾起對方傷心事喇。