首輪政改諮詢已經完結，收到13萬份書面意見書，聽聞政制局嘅同事仲係喺度拆緊箱，倒晒啲意見書出嚟，個個都變咗亡國興，皆因政制及內地事務局局長譚志源噚日出席華人革新協會晚宴時致詞話，班同事個個做到「日以繼夜，夜以繼日」，整理同歸納收到嘅意見。其實政改由阿爺一錘定音，13萬份意見書講乜都冇用，整理意見都係做show。
譚志源重申，未來兩個月內提交諮詢報告，希望年底前拋出方案，進行第二輪諮詢。揀年底嚟公佈方案，屆時普天同慶聖誕新年，政府分明就係想削弱政改討論氣氛。譚志源同基本法委員會副主任梁愛詩噚晚被成班記者追問，點睇佔中嘅投票結果，兩個人都話唔評論。